Traballamos en grupo!!
- Roi
- 16 dic 2017
- 2 Min. de lectura
Ola a todos!
Nesta entrada quería falarvos da importancia do traballo grupal. Actualmente na escola, pecamos de exceso de traballo individual, exames, tarefas e probas individuais privan aos rapaces de ver o punto de vista dos demais, de poñerse no seu lugar ou de interactuar e ver diferentes formas de traballar. A lexislación actual recolle que unha parte fundamental da avaliación consiste en recabar información de forma grupal, fomentar o espírito investigador. Sei que co ritmo de vida actual é un incordio coordinar a 5 rapaces e rapazas para que poidan quedar para traballar en grupo, pero penso que os beneficios son moito máis grandes que as molestias que ocasiona a coordinación de horarios entre eles.
Papás e mamás, pensade por un momento en cando erades pequenos, cando tiñades a idade dos vosos fillos. Estabades na rúa a meirande parte do voso tempo libre, non había internet e todas as experiencias e o coñecemento se buscaba falando cos demais, indo a unha biblioteca, falando cos nosos maiores etc... non podemos quitarlles isto aos rapaces. Nunha época na que xurden tantos conflictos na escola e fóra dela, a mellor forma de atallalos é que se relacionen entre eles, que traballen xuntos, que se entendan, en definitiva sen ter que mediar nós seguido.
Despois deste rollo que vos soltei, quería ensinarvos o magnífico traballo que fixeron os alumnos e alumnas de quinto A, pescudando información sobre os sentidos e o sitema nervioso, conseguiron elaborar uns materiais sorprendentes e expoñerlles ao resto da clase a información que aprenderon con eles; unha información que para eles gañou significado e que é máis fácil que se quede nas súas mentes porque a fixeron súa.
Quero felicitar a todos os meus alumnos e alumnas, dos que estou moi orgulloso, e a pesar de non poder estar con eles e elas estes días, quero desexarlles un Bo Nadal.
Tamén a vós, papás e mamás, deséxovos Bo Nadal e recórdovos que me podedes contactar a través do blogue, na segunda páxina(nosotros) hay un botón para deixar as vosas mensaxes.
Comments